رباعيات صـلاح جاهـين أشعـار بالعامية المصريـة إليهم . . مع إن كل الخلق من أصل طين وكلهم بينزلوا مغمضـين بعد الدقايق والشهور والسنين تلاقي ناس أشرار وناس طيبين عجبي!! عجبي عليك..عجبي عليك يا زمن يا بو البدع يا مبكي عيني دمـاً ازاي أنا أختار لروحي طريق وأنا اللي داخل في الحياة مرغماً عجبي!! مرغم عليك يا صبح مغصوب يا ليل لا دخلتها برجليا ولا كان لي ميل شايلني شيل دخلت أنا في الحياة وبكره ح اخرج منها شايلني شيل عجبي!! سنوات وفايته عليّا فوج بعد فوج واحدة خدتني ابن والتانية زوج والتالتة أب خدتني والرابعة ايه ايه يعمل اللي بيحدفه موج لموج عجبي!! وانا في الضلام من غير شعاع يهتكه أقـف مـكـاني بخوف ولا اتركه ولما ييجي النور واشوف الدروب أحتار زيادة .. أيهم اسلكه؟ عجبي!! نظرت في الملكوت كتير وانشغلت وبكل كلمة (ليه) و(عشانيه) سألت أسأل سـؤال الرد يرجع سـؤال وأخرج وحيرتي أشد ممـا دخلـت عجبي خرج ابن آدم من العدم قلت: ياه رجع ابن آدم للعدم قلت: ياه تراب بيحيا .. وحي بيصير تراب الأصل هو الموت و الا الحياه ؟ عجبي!! ضريح رخام فيه السعيد اندفن و حفره فيها شريد من غير كفن مريت عليهم .. قلت يا للعجب لاتنين ريحتهم فيها نفس العفن عجبي !! ياما صادفت صحاب و ما صاحبتهمش و كاسات خمور و شراب و ما شربتهمش أندم علي الفرص اللي انا سبتهم و الا علي الفرص اللي ما سبتهمش عجبي !! و الكون ده كيف موجود من غير حدود و فيه عقارب ليه و تعابين ودود عالم مجرب فات و قال سلامات ده ياما فيه سؤالات من غير ردود عجبي !! غدر الزمان يا قلبي ملهوش أمان وحاييجي يوم تحتاج لحبة إيمان قلبي ارتجف وسألني .. أأمن بإيه؟ أأمن بإيه محتار بقالي زمان عجبي!! يا باب أيا مقفول .. إمتى الدخول صبرت ياما واللي يصبر ينول دقيت سنين .. والرد يرجعلي: مين؟ ولو كنت عارف مين أنا .. كنت أقول عجبي!! أنا شاب لكن عمري ولا ألف عام وحيد ولكن بين ضلوعي زحام خايف و لكن خوفي مني أنا أخرس و لكن قلبي مليان كلام عجبي !! أحب أعيش ولو في الغابات أصحي كما ولدتني أمي و ابات طائر .. حوان.. حشرة .. بشر ..بس أعيش محلا الحياة.. حتي في هيئة نبات عجبي !! سهير ليالي و ياما لفيت و طفت و ف ليه راجع في الضلام قمت شفت الخوف ... كأنه كلب سد الطريق و كنت عاوز أقتله .. بس خفت عجبي !! كان فيه زمان سحليه طول فرسخين كهفين عيونها و خشمها بربخين ماتت لكين الرعب لم عمره مات مع إنه فات بدل التاريخ تاريخين عجبي !! عجبتني كلمة من كلام الورق النور شرق من بين حروفها و برق حبيت أشيلها ف قلبي .. قالت حرام ده أنا كل قلب دخلت فيه اتحرق عجبي !! رقبه قزازة و قلبي فيها انحشر شربت كاس و اتنين و خامس عشر صاحبت ناس م الخمرة ترجع وحوش و صاحبت ناس م الخمرة ترجع بشر عجبي !! كل اللي في الخمارة صابهم جنون صبحوا الرجال يتبادلوا كاس المنون وبدم ونبيت انكتب ع الجدار يا ميت ندامة ع اللي قلبه حنون عجبي!! قالوا الشقيق بيمص دم الشقيق والناس ماهياش ناس بحق وحقيق قلبي رميته وجبت غيره حجر داب الحجر ورجعت قلبي رقيق عجبي!! يوم قلت آه .. سمعوني قالوا فسد ده كان جدع قلبه حديد واتحسد رديت على اللايمين انا وقلته آه لو تعرفوا معنى زئير الأسد عجبي!! بين موت وموت .. بين النيران والنيران ع الحبل ماشيين الشجاع والجبان عجبي علادي حياة .. ويال العجب ازاي أنا - يا تخين - بقيت بهلوان عجبي!! أنا قلبي كان شخشيخة أصبح جرس جلجلت به صحيوا الخدم والحرس أنا المهرج .. قمتو ليه خفتو ليه؟ لاف ايدي سيف ولا تحت مني فرس عجبي!! دخل الربيع يضحك لقاني حزين نده الربيع على اسمي لم قلت مين حط الربيع أزهاره جنبي وراح وايش تعمل الأزهار للميتين عجبي!! مهبوش بخربوش الألم والضياع قلبي ومنزوع م الضلوع انتزاع يا مرايتي ياللي بترسمي ضحكتي يا هلترى ده وش وللا قناع عجبي!! حبيت .. لكن حب من غير حنان وصاحبت لكن صحبة مالهاش أمان رحت لحكيم وأكتر لقيت بلوتي إن اللي جوه القلب مش ع اللسان عجبي!! ليه يا حبيبتي ما بيننا دايما سفر ده البعد ذنب كبير لا يغتفر ليه يا حبيبتي ما بيننا دايما بحور أعدي بحر ألاقي غيره اتحفر عجبي !! ورا كل شباك ألف عين مفتوحين و انا وانتي ماشيين يا غرامي الحزين لو التصقنا نموت بضربة حجر و لو افترقنا نموت متحسرين عجبي !! نوح راح لحاله و الطوفان استمر مركبنا تايهه لسه مش لاقيه بر آه م الطوفان وآهين يا بر الأمان إزاي تبان و الدنيا غرقانه شر عجبي !! علي رجلي دم .. نظرت له ما احتملت علي إيدي دم.. سألت ليه ؟ لم وصلت علي كتفي دم.. و حتي علي رأسي دم أنا كلي دم .. قتلت ؟ .. ولا اتقتلت عجبي !! انا كل يوم أسمع .. فلان عذبوه أسرح في بغداد و الجزاير واتوه ما أعجبش م اللي يطيق بجسمه العذاب و اعجب من اللي يطيق يعذب أخوه عجبي !! ينبوع و في الحواديت أنا سمعت عنه إنه عجيب .. و ف وسط لهاليب لكنه شقيت كما الفرسان طريقي .. لقيت حتي الخنازير و الكلاب شربوا منه عجبي !! يا قرص شمس ما لهش قبة سما يا ورد من غير أرض شب و نما يا أي معني جميل سمعنا عليه الخلق ليه عايشين حياه مؤلمة عجبي !! شاف الطبيب جرحي وصف له الأمل وعطاني منه مقام يا دوب ما اندمل مجروح جديد يا طبيب و جرحي لهيب ودواك فرغ مني .... و إيه العمل عجبي !! أعرف عيون هي الجمال و الحسن واعرف عيون تاخد القلوب بالحضن وعيون مخيفة و قاسية وعيون كتير وباحس فيهم كلهم بالحزن عجبي !! إيش تطلبي يا نفس فوق كل ده حظك بيضحك و انتي متنكده ردت قالت لي النفس : قول للبشر ما يبصوليش بعيون حزينة كده عجبي !! إقلع غماك يا تور وارفض تلف إكسر تروس الساقية و اشتم وتف قال : بس خطوة كمان .. وخطوة كمان يا اوصل نهاية السكة يا البير تجف عجبي !! يا حزين يا قمقم تحت بحر الضياع حزين أنا زيك و إيه مستطاع الحزن ما بقالهوش جلال يا جدع الحزن زي البرد ... زي الصداع عجبي !! في يوم صحيت شاعر براحة و صفا الهم زال و الحزن راح و اختفي خدني العجب و سألت روحي سؤال أنا مت ؟ و لا وصلت للفلسفة عجبي !! الفيلسوف قاعد يفكر سيبوه لا تعملوه سلطان و لا تصلبوه ما تعرفوش إن الفلاسفه يا هوه اللي يقولوه بيرجعوا يكدبوه عجبي !! علي بعد مليون ميل من أرضنا من الفراغ الكوني بصيت أنا لا شفت فرق بين جبال و بحور و لا شفت فرق ما بين عذاب أو هنا عجبي !! إنسان أيا إنسان ما أجهلك ما أتفهك في الكون و ما أضألك شمس وقمر و سدوم و ملايين نجوم و فاكرها يا موهوم مخلوقه لك عجبي !! نظرت فوق للنجوم و انا ساير رجليا عترت في الحفر و الحجاير بقيت أقول و انا ع التراب: يا سلام مش بس عبره أخذت لكن عباير عجبي !! - يا نجم .. نورك ليه كده بيرتجف ؟ هو انت قنديل زيت ؟ أو تختلف - أنا نجم عالي .. بس عالي قوي و كل ما انظر تحت اخاف انحدف عجبي !! السم لو كان في الدوا منين يضر ؟ و الموت لو عدونا .. منين يسر؟ حط القلم في الحبر و اكتب كمان .. و العبد للشهوات .. منين هو حر؟ عجبي !! وقفت بين شطين علي قنطـرة الكدب فين و الصدق فين يا تري محتار ح اموت .. الحوت خرج لي وقالي هو الكلام يتقـاس بالمسطرة عجبي !! سرداب في مستشفي الولاده طويل صرخات عذاب ورا كل باب وعويل .. وفي الطـريق متزوقين البنات متزوقـين للحب و المواويل عجبي !! الدنيا أوده كـبيره للانتظار فيها ابن أدم زيه زي الحـمار الهم واحد .. و الملل مشـترك و مفيش حمار بيحاول الانتـحار عجبي !! أيوب رماه البين بكل العلل سبع سنين مرضان وعنده شلل الصـبر طيب .. صبر أيوب شفاه بس الأكـاده مات بفعل الملل عجبي !! نسمة ربيع لكن بتكوي الوشوش طيور جميلة بس من غير عشـوش قلوب بتخفق إنما وحـدها هي الحياه كده .. كلها في الفاشوش عجبي !! يا طير يا عالي في السـما طظ فيك ما تفتكرشي ربنا مصطـفيك برضـك بتاكل دود و للطين تعًًًًودً تمـص فيه يا حلو .. و يمص فيك عجبي !! كروان جريح مضروب شعاع م القمر سقط من السموات فؤاده انكسـر جريت عليه قطه علشان تبلعـه أتاريه خيال شعراء و مالهوش أثر عجبي !! ياللي نصحت الناس بشـرب النبيت مع بنت حلوه .. وعود , وضحك , وحديت مش كنت تنصحهم منين يكسـبوا تمن ده كله ؟ ... و الا يمكن نسـيت عجبي !! ما حد في الدنيا واخد جزاته و لا حد بيفكر في غير لذاذاته ما تعرفيش يا حبيبتي .. أنا و انتي مين؟ إنتي عروس النيل .. و أنا النيل بذاته عجبي !! رقاصه خرسا و رقصه من غير نغـم دنيا . . يا مين يصالحها قبل الندم ساعتين تهز بوجههـا يعنـي لأ يترجرجوا نهديها يعني نعـم عجبي !! إخطفني ياللي تحبني ع الحصان الدنيا قالت يوم في ماضي الزمان إخطفني ياللي تحبني ع الـفرس الدنيا قالت .. قام خطفها الشيطان عجبي !! من بين شقوق الشيش و شقشقت لك مع شهقة العصافير و زقزقـت لك نهار جديد انا . . قوم نشوف نعـمليه انا قلت يا ح تقتلني .. يا ح اقتلك عجبي !! قلبي عليل يا ناس وفي الكاس دواه مديت له ايدي شربت م اللي حواه جنبي الشمال خف .. اليمين اتوجع وايه يداوي الكبد م اللي كواه عجبي!! .. دي مزكرات و كتبتها من سـنين في نوتة زرقا لون بحور الحنيـن عترت فيها .. رميتها في المهمـلات وقلت صحيح أما صحيح كلام مخبولين عجبي !! دخل الشتا وقفل البيبان ع البيوت وجعل شعاع الشمس خيط عنكبوت وحاجات كتير بتموت في ليل الشـتا لكن حاجات أكتر بترفض تمـوت عجبي !! - الدنيا من غير الربيع ميته ورقة شجر ضعفـانه و مفتته - لا يا جدع غلطان تأمل وشوف زهر الشتا طالع في عز الشـتا عجبي !! ياللي انت بيتك قش مفروش بريش تقوي عليه الريح .. يصبح ما فيش عجبي عليك حواليك مخالب كـبار و ما لكش غير منقار و قادر تعيش عجبي !! سمعت نقطة ميه جوه المحيـط بتقول لنقطه ما تنزليش في الغويط أخاف عليكي م الغرق .. قلـت أنا ده اللي يخاف م الوعد يبقي عبيط عجبي !! جالك أوان ووقفت موقف وجـود يا تجود بده يا قلبي يا بده تجـود ما حد يقدر يبقي علي كل شـيء مع إن – عجبي – كل شئ موجود عجبي !! جالك أوان وعرفت مشي الجنايز كيف شفتها يا عبد رب اللذايـذ قال : شفت شيل بالحيل فقير أو أميـر كما شالوا في الخمامير فواضي القزايـز عجبي !! أنا كنت شئ و صبحت شئ ثم شـيء شوف ربنا .. قادرعلي كل شـئ هز الشجر شواشيه ووشوشني قال : لابد ما يموت شئ عشان يحيا شيء عجبي !! يا مشرط الجراح أمانة علـيك وأنت ف حشايا تبص من حواليـك فيه نقطة سوده في قلبي بدأت تبان شيلها كمان .. و الفضل يرجع إليك عجبي !!! كيف شفت قلبي و النبي يا طبيب همد و مات و الا سامع له دبيب قاللي لقيته مختنق بالدموع و ما لوش دوا غير لمسه من إيد حبيب عجبي !! تسلم يا غصن الخوخ يا عود الحطـب بييجي الربيع .. تطلـع زهورك عجب و انا ليه بيمضـي ربيع وييجي ربيع و لسه برضك قلـبي حتة خشب عجبي !! بحر الحياه مليان بغرقي الحياه صرخت خش الموج في حلقي ملاه قارب نجاه .. صرخت قالوا مفيش غير بس هو الحب قارب نجاه عجبي !! فارس وحيد جوه الدروع الحديد رفرف عليه عصفور وقال له نشيد منين .. منين.. و لفين لفين يا جدع قال من بعيد و لسه رايح بعيد عجبي !! كان فيه قمر كأنه فرخ الحمام علي صغره دق شعاع شق الغمام أنا كنت حاضر قلت له ينصرك إشحال لما حتبقي بدر التمام عجبي !! النهد زي الفهد نط اندلع قلبي انهبش بين الضلوع و انخلع ياللي نهيت البنت عن فعلها قول للطبيعة كمان تبطل دلع عجبي !! صوتك يا بنت الإيه كأنه بدن يرقص يزيح الهم يمحي الشجن يا حلوتي و بدنك كأنه كلام كلام فلاسفه سكروا نسيوا الزمن عجبي !! كرباج سعاده وقلبي منه اجلد رمح كأنه حصان و لف البلد و رجع لي نصل الليل و سألني .. ليه خجلان تقول انك سعيد يا ولد عجبي !! مزيكة هادية الكون فيها انغمر وصيف و ليل و عقد فل و سمر يا هلتري الناس كلهم مبسوطين و يا هلتري شايفين جمال القمر عجبي!! إنشد يا قلبي غنوتك للجمـال و ارقص في صدري من اليمين للشمال ما هوش بعيد تفضل لبكره سعيـد ده كل يوم فيه الف الف احتمـال عجبي !! آه لو انا و محبوب جزنا الفضـا في سفينة وحدينا .. واشيا رضـا ساعة صفا تعجبنا نرجع لهـا و الهم قبل ما ييجي .. يبقي مضـى عجبي !! أنا إله الوجد رب الهيـام أضرب بسهم الوهم وهم الغرام و هم الغرام من كتر ما هو لذيذ رشقت انا ف صدري جميع السهام عجبي !! حدوته عن جعران و عن خنفسـه اتقابلوا حوا بعض ساعة مسـا و لا قال لهم حد اختشوا عيب حـرام و لا حد قال دي علاقة متدنسـة عجبي !! ياللي عرفت الحب يوم و انطـوى حسك تقول مشتاق لنبع الهـوى حسك تقول مشتاق لنبع الغـرام ده الحب مين داق منه قطره منه ارتوى عجبي!! زحام و أبواق سيارات مزعجـة للي يطول له رصيف.. يبقي نجـا لو كنت جنبي يا حبيبي أنـا مش كنت أشوف إن الحياة مبهجة عجبي!! إيديا في جيوبي وقلبي طرب سارح في غربة بس مش مغترب و حدي لكين ونسان و ماشي كده وبابتعد ما اعرف .. أو باقترب عجبي !! يا ميت ندامه ع القلوب الخلا لا محبة فيها و لا كراهـه ولا حتي يا قلبي الحزن ما عادش فيك معلهش .. لك يوم برضه راح تتملا عجبي !! مرحب ربيع مرحب ربيع مرحبه يا طفل يا للي ف دمي ناغا وحبا علشان عيونك يا صغنن هويـت حتي ديدان الأرض و الأغربـه عجبي !! فتحت شباكي لشمس الصباح ما دخلش منه غير عويل الرياح و فتحت قلبي عشان ابوح بالألم ما خرجش منه غير محبه و سماح عجبي !! غمست سنك في السواد يا قلم عشان ما تكتب شعر يقطر ألم مالك جرالك إيه يا مجنون .. و ليه رسمت ورده وبيت و قلب و علم عجبي !! انا الذي عمري اشتياق في اشتياق و قطر داخل في محطة فـراق قصدت نبع السم وشربت سـم من كتر شوقي وعشمي في التريـاق عجبي !! أنا الذي عشت الزمن مضيعـه بروح حزينة معفنة مضعضعـه زرعت شجرة سنط لجل انجـرح لقتها شعر البنت و مفرعـه عجبي !! لو فيه سلام في الأرض وطمان و أمن لو كان مفيش و لا فقر و لا خوف جبن لو يملك الانسان مصير كل شـيء انا كنت اجيب للدنيا ميت ألف ابن عجبي !! العشب طاطا للنسايم و نخ أخضر طري مالهش في الحسن أخ عصفور عبيط انا .. غاوي بهجه و غنا ح انزلهنا.. و انشا لله يهبرني فخ عجبي !! أوصيك يابني بالقمر و الزهور أوصيك بليل القاهرة المسحـور و إن جيت في بالك .. إشتري عقد فل لأي سمرا.. وقبري إوعك تـزور عجبي !! غمض عينيك و ارقص بخفة و دلع الدنيا هي الشابة و انت الـجدع تشوف رشاقة خطوتك تعبـدك لكن انت لو بصيت لرجليك ..تـقع عجبي !! حاسب من الاحزان و حاسـب لها حاسب علي رقابيك من حبلـها راح تنتهي و لابد راح تنتهـي مش انتهت أحزان من قبلهـا؟ عجبي !! يأسك و صبرك بين إيديك و انت حر تيأس ما تيأس الحياه راح تـمر أنا دقت مندا ومندا عجبي لقيـت الصبر مر و برضك اليـأس مـر عجبي !! ولدي نصحتك لما صوتي اتنبـح ماتخفش من جني و لا من شبـح و ان هب فيك عفريت قتيل إسأله ما دافعش ليه عن نفسه يوم مااندبح عجبي !! ولدي إليك بدل البالون ميت بالون انفخ وطرقع فيه علي كل لـون عساك تشوف بعينك مصيرالرجـال المنفوخين في السترة و البنطلـون عجبي !! خوض معركتها زي جدك ما خـاض صالب و قالب شفتك بامتـعاض هي كده...ما تنولش منها الأمل غير بعض صد ورد ووجاع مخاض عجبي !! كام اشتغلت يا نيل في نحت الصخور مليون بئونه و الف مليون هاتور يا نيل أنا ابن حلال و من خلفتك و ليه صعيبه علي بس الأمـور عجبي !! منين أجيبها كلمه متألمـة لعيبه فايره حايره و مصممه منين أجيبها كلمه تكون بنـت ارض تشفي اللي ما شافهوش كلام السمـا عجبي !! أنا قلت كلمة و كان لها معنيين كما بطن واحده و توأمين زي وشين لو دنيا شر.. التوأم الخير يمـوت لو دنيا خير .. الشر ح يعيش منين عجبي !! أنا اللي بالأمر المحال اغتـوى شفت القمر نطيت لفوق في الهـوا طلته ما طلتوش إيه انا يهمنـي و ليه .. ما دام بالنشوة قلبي ارتوي عجبي !! بره القزاز كان غيم و أمطار و بـرق ما يهمنيش – أنا قلت – و لا عندي فرق غيرت رأيي بعد ساعة زمـان و كنت في الشارع .. و في الجزمة خرق عجبي !! عيني رأت مولود علي كتف أمـه يصرخ تهنن فيه يصرخ تضـمه يصرخ تقول يا بني ما تنطق كلام ده اللي ما يتكلمش يكتر همـه عجبي !! يا عندليب ما تخافش من غنوتك قول شكوتك و احكي علي بلوتك الغنوه مش ح تموتك إنمـا كتم الغنا هو اللي ح يموتـك عجبي !! ياللي بتبحث عن إله تعـبده بحث الغريق عن أي شئ ينجـده الله جميل و عليم و رحمن رحـيم أجمل صفاته .. وانت راح توجده عجبي !! حقرا و فوق كوكب حقير محتقـر في الكون تكون دنياكو إيه يا بقر رملايه من صحرا ؟ لكين إيش تقول و الكون بحاله جوه عقل البشـر عجبي !! لا تجبر الانسان و لا تخّـيره يكفيه ما فيه من عقل بيحيره اللي النهارده بيطلبه و يشتهيه هو اللي بكره ح يشتهي يغيره عجبي !! ياللي في حماه الشمس تلقي المـلاذ و ألف بكره و بكره .. في ضلوعه لاذ مين أنت ؟ مارد ؟ رب ؟ قال لأ ده بس انا اللي باروي القمح و اسقي الفولاذ عجبي !! غسل المسيح قدمك يا حافي القـدم طوبي لمن كانوا عشانك خـدم صنعت لك نعليك أنا يا أخـي مستني إيه .. ما تقوم تدوس العدم عجبي !! البط شال عدي الجبال و البحـور ياما نفسي اهج .. احج ويا الطيور أوصيك يا ربي لما اموت .. و النبي ما تودنيش الجنه .. للجنه سـور عجبي !! طال انتظاري للربيع يرجـع و الجو يدفا و الزهور تطلـع عاد الربيع عارم عرمرم شبـاب إيه اللي خلاني ابتديت افـزع ؟ عجبي!! و لو انضنيت و فنيت وعمري انفرط مش عاوز الجأ للحلول الوسـط و كمان شطط و جنون مانيش عـاوز يا مين يقول لي الصح فين والغلـط عجبي !! عاد الربيع كأنه طعم الحـب و الحب نار جوه العروق بتصب أتمتع ازاي بيه وانا متقطـع من كتر خوفي لا في الخطيئة يطب ؟ عجبي!! ازاي شبابنا يقوم و ياخد دوره من غير صراخ يئذيه و يجرح زوره يا هلتري أحسن له يقعد ساكـت أو ينترك و لو خرج عن طـوره ؟ عجبي!! عيني رأت عصفور ووياه ابـنه بيحدفه في الريح و ياخده ف حضنه نوبتين و تالت نوبه – عجبي عليهم – كانوا سوا بيرفرفرا و يغنـوا عجبي !! أحسن ما فيها العشق و المعشقـة و شويتين الضحك والتريقـة شفت الحياة . لفيت . لقيت الألـذ تغييرها . و ده يعني التعب و الشقا عجبي !! عجبي علي العجب العجيب العجاب لما الحقيقة تطل بعد احتجاب و تروق و تحلا وفجأة تصبح مفيش كمثل طراطيش بحر ياما خد و جاب عجبي !! في الهو ماشي يا بهلوان إش إِش يا فراشة منقوشة علي كل وش شقلبت عقلي و عقلي شقلبني و كنت باحسبني بقيت ما اندهش عجبي !! وقفت ساعة الصبح باغسل سناني قالت لي شايف قوتي و لمعاني ؟ إيش تطلب اليوم مني ضحكة أسد ؟ والا ابتسامة اعلانات أمريكاني ؟ عجبي !! الحلو يمّ اليمّ صابـح رايح سارح في حضن الميه سابح سايح الحلو داب في البحر . قلت أدوقه وجدت لسه البحر برضك مالح عجبي !! يا كل كلمة للعجب في قامـوس إنسكلوبيديا لسان العرب أو لا لاروس تعالوا نجدة . ده لسه في عصـرنا الشمس و البحر العريض بالفـلوس عجبي !! الموج تلول تهبط وتطلع تلـول يا بحر خدني الشط صاحبك ملـول و لا بلاش الشط ح اعمل به أيـه ده ريحته طحلب مهري و ام الخلول عجبي !! عيني رأت مخلوق في غاية البشاعة أنا قلت له لما تأملته ساعـة اللذه و الموت علموك اللـزج و أنا علموني الفلسفة والشجاعة عجبي!! غطس وقب الموج نهود بمـبي من ألف جيل جمالات ما تعلم بي يا قلبي عيب دول امهاتنا القدام أستغفر الله العظيم ربـي عجبي !! علقت في المسمار قناع مهزلة ومعاه قناع مأساة بحزنه ابتـلا بصيت لقيتهم يشبهوا بعضهـم واهو ده العجب يا ولاد و إلا فلا عجبي !! ظهر المسيح الحي علي سفح ربـوة و نزل بهالة الضي و قعد في قهـوة بصوا .. تعالوا .. قالوا خليه في حاله الناس في حالهم يا بني .. مالهمش دعوة عجبي !! لولا اختلاف الرأي يا محـترم لولا الزلطتين ما لوقود انضرم و لولا فرعين ليف سوا مخاليف كان بيننا حبل الود كيف اتبرم ؟ عجبي!! يا وردة قلبي معاكي في الريح لعب لا تعبتي م الريح و لا قلبي تعـب إحنا كده : نرتاح في صخب الجنون و في السكون بنخاف قوي و نترعب عجبي !! ما انتاش بتلعب ليه يا روح بابا ؟ و لا عسكري و لا لص في عصابة ؟ إلعب أسد أو ديب رهيب أو غـزال دي الدنيا في نهاية المطاف غابـة عجبي !! ورد في ورق سلوفان يا حلوة اهديلك ؟ و الا انقله بالطين في شتلة و اجيلك الأولاني لو وحا بحنـانـي عجبي علي التاني بإيه يوحيلـك عجبي !! أنا قلبي كوكب و انطلق في المدار حواليكي يا محبوبتي يا نور ونار يلف مهمـا يلف ما بيكتفيش وتمللي نصه ليل و نصه نهـار عجبي !! الأرض شوك أيوه لكين هايـش و الحمرة مش يعني الطريق حايش دي دمنا السيال .. وبُشرة خير إن انتي عايشه و إن أنا عايش عجبي !! إيه اللي خدته من مرور السنـين يا قلبي إلا دمعتك و الأنيـين بتئن و بتفرح و ترجع تحـن مع إن مش كل البشـر فرحانين عجبي !! أوقات أفوق و يحل عني غبـايا واشعر كأني فهمت كل الخبايا و افتح شفايفي علشان أقول الدرر ما أقولش غير حبة غزل في الصبايا عجبي !! مركب ورق من نفخة تتطوح ركبتها و الكل بيلوح سوحت فيها اتنين و خمسين سنه للآن ... و لا بتغرق و لا تروح عجبي!! عالجسر فت الصبح تحت الضباب بين اللي لسه بينغرس و اللي طاب ما اهتز قلبي لنبت طالع جديـد قد اللي ماشي .. وتحت باطه كتاب عجبي !! يا خالق الكون بالحساب و الجبر و خالقني ماشي بلختيار و الجبر كل اللي حيلتي زمزمية أمـل وازاي تكفيني لباب القـبر؟ عجبي!! قاعدة قناني الخمر ساكتة و ساهية مع ابن آدم في الشبه متناهيـة مفيش كده روقان في لحظة تشوفهم و بعدها بلحظه يودوا في داهيـه عجبي !! حتة محارة وجدتها في يوم لقيـّة قالت لي شوف كيف الطبيعة شقية؟ نظرت للكهف اللي فيها ولقيت إن الطبيعة كمان .. لا أخلاقيـة عجبي !! بلياتشو قال إيه بس فايدة فنوني ؟ و تلات وقق مساحيق بيلونونـي و الطبل و المزامير و كتر الجعـير إذا كان جنون زبوني زاد عن جنوني عجبي !! نقطة مرارة كمان علي مشروبي دوبها يا ساقي حسب مطلوبـي طعم الحياة .. مش برضه فيها وفيها ؟ ليالي وردي و نهارات خروبـي ؟ عجبي!! وسط الحطام اتفرجوا يا أنـام تمثال ملك . و مبوله م الرخام لتنين نحتهم نفس أسطي الحجـر و كانوا ذات يوم كتلتين لسه خام عجبي !! عيد و العيال اتنططوا ع القبور لعبوا استغمايه .. و لعبوا بابور و باللونات و نايلونات شفتشـي و الحزن ح يروح فين جنب السرور عجبي !! أنا قلبي كورة و الفراودة أكـم ياما اتنطح و انشاط و ياما اتعكم و اقول له كله ح ينتهي في المعـاد يقول بساعتك ؟ ولا ساعة الحكم ؟ عجبي!! الضحك قال يا سم ع التكشيـر أمشير و طوبه وانا ربيعي بشيـر مطرح ما باظهر بانتصر ع العدم انشالله أكون رسماية بالطباشيـر عجبي !! أهوي الهوى و همس الهوي في العيون وبسمة المغرم ودمعة الحنـون و زلزلات الحب نهد الصبـا أكون انا المحبوب أو لا أكـون عجبي !! يا ملونين البيض في شم النسيـم لون الحنين و الشوق و خمر النديم ما تعرفوش سايق عليكو النبـي تلونوا الأيام بلون النعيـم ؟ عجبي!! الدنيا صندوق دنيا .. دور بعد دور الدكة هي .. و هي كل الديكـور يمشي اللي شاف ويسيب لغيره مكان كان عربجي أو كان امبراطـور عجبي !! قطي العزيز راقد علي الكنبـات في نوم لذيذ .. و بيلحس الشنبات و انا كل عين فنجان مدلدق قلـق صدق اللي قال إن الحياة منابات عجبي !! قالوا السياسة مهلكة بشكل عـام و بحورها يا بني خشنة مش ريش نعام غوص فيها تلقي الغرقانين كلهـم شايلين غنايم .. و الخفيف اللي عـم عجبي !! سلام سلام ... سلام سلام ... سلام كلام كلام ... كلام كلام ... كلام هز الورق يا صاحبي كدهـوه يطلع كلام سلام .. و سلام كلام عجبي !! فوق تحت . ورا قدام . يمين شمـال في الجو . تحت الميه . أو في الرمال طلب الكمال يحرم علي الممـكن و الممكنات دول محرومين م الكمال عجبي !! هات يا زمان و هات كمان يا زمان غير بسمة الشجعان مامني يـبان هو اللي داق الفرحة يوم ثورتـه يقدر يعود و لا ثانية للأحـزان ؟ عجبي!! عبثا باقول واقرا في سورة عبس ماتلومش حد إن ابتسم أو عبس فيه ناس تقول الهزل يطلع جـد و ناس تقول الجد يطلع عبـث عجبي !! يومي علي الله تنتهي و تغيـب الشمس و تعود تاني يوم لهاليب زي الحياة مأساه و من كترهـا بقي لا انتهاءها و ابتداءها عجيب عجبي !! علم اللوع اضخم كتـاب في الأرض بس اللي يغلط فيه يجيبـه الأرض أما الصراحة فأمرها سـاهل لكن لا تجلب المال و لا تصون عرض عجبي !! أنا كان لي أب . و كان رئيس محكمه ستين سنة .. في قضية واحدة أترمي ستين سنة و طلع براءة و خـرج يشكي الحياة و الموت لرب السمـا عجبي !! قالوا ابن آدم روح و بدنه كفـن قالوا لأ بدن . قالوا لأ ده روح في بدن رفرف فؤادي مع الرايات في الهـوا أنا قلت لأ روح في بدن في وطـن عجبي !! - 12 -