memex/gharbeia.net/content/posts/drafts/كيف تتعامل مع تفتيش التليفونات.md

title, date, draft

title	date	draft
كيف تتعامل مع تفتيش التليفونات؟	2004-01-01T00:00:00-00:00	true

تزايدت مؤخرا حالات توقيف الشرطة للناس و خصوصا الشباب في الشارع و تفتيشهم و بالذات تفتيش تليفوناتهم خصوصا الفيسبوك و الرسائل و الصور. دا ساعات بتكون نتيجته القبض على الشخص لفترة قصيرة أو طويلة و ممكن توصل للنيابة و المحكمة كمان. فريق الموقف المصري بيقدم الاستراتيجيات التالية للتعامل مع الموقف دا.

الاستراتيجية الأولى: اعتمد على شخصيتك و حظك و علاقاتك

رهانك هنا على حظك أن مزاج أمين الشرطة أو الضابط ال موقفك كويس النهاردا، أو أن شكلك هيعجبه و يقول عليك ابن ناس و مش بتاع مشاكل و لا سياسة و هيسيبك تمشي، أو في حالة أنه ما سابكش تمشي و أخدك على القسم أن اللي في القسم، و يمكن اتصالاتك و معارفك، يخلوك تمشي، أو أن اللي في النيابة... أو اللي في المحكمة... و أن دا كله يخلص بسرعة و من غير تكاليف كثير من صحتك و فلوسك و حريتك. أطيب التمنيات مع نظام العدالة الجنائية المصري.

الاستراتيجية الثانية: تمسك بحقك و ارفض التعاون مع الشرطة

"...و لا يصح لرجل الشرطة أن يستوقف كل المارة في طريق عام ليطلع على بطاقة تحقيق شخصية كل منهم ما لم يضع الشخص نفسه باختياره موضع الريب و الشكوك، لأن في استيقاف جميع المارة أو المركبات عشوائيا في هذه الكمائن إهدارا لقرينة البراءة المفترضة في الكافة و ينطوي على تعرض لحرية الأفراد في التنقل المقررة في الفقرة الأولى من المادة 41 من الدستور..."

من حكم محكمة النقض في الطعن رقم 51965 لسنة 73 قضائية، ال هي قضية تزوير عملة أخد فيها المتهم براءة بالرغم من أنه اتمسك بعملة مزيفة لأن الكمين غير دستوري.

أنت هنا قاصد تدخل نفسك في مشكلة شخصية علشان تحل مشكلة عامة، و هي أن الشرطة و بقية الدولة بتتصرف خارج القانون، و أنت و غيرك دورهم أنهم يلزموا الشرطة و الدولة بالقانون، لأنك إنسان و لك حقوق.

• محتاج تعرف القانون بشكل أكثر من المتوسط علشان تعرف حقك فين. القانون المصري على عيوبه الكثير إلا أنه لا يعترف بالكمين أو بتوقيف الناس في الشوارع و تفتيشهم إلا في حالتين اثنين بس: التلبس و الاشتباه. الداخلية عادة بتبني ورقها على الاشتباه و التعليمات بالتوسع (غير القانوني) في دائرة الاشتباه، و في أغلب الأحوال بتلاقي المحضر مكتوب بطريقة "و أثناء ذلك بدت على المتهم علامات التوتر" و وقع منه حرز، زي فلوس مزورة أو سلاح أو مخدرات. و بالتالي بقى في موضع التلبس
• محتاج محامي مش عادي. المحامي إنسان عملي جدا و كل ال يهمه، لو هو محامي كويس، أنه يخلص موكله من المشكلة و يخلص من القضية دي و يقبض أتعابه و يدخل على القضية ال بعدها. قليلين المحامين اللي مهتمين بالصالح العام و بالتالي مش عاوزين بس يشتغلوا بالقواعد و يحلوا مشاكلهم، لكن كمان عاوزين يغيروا القواعد دي لأنها غلط و فيها عيوب أساسية، سواء كانت عيوب في الممارسات، زي الكمين، أو عيوب في التشريعات نفسها.
• اعرف أن المعركة برا المحكمة و في الكلام مع المجتمع قد ما هي بالقانون و جوا المحكمة، و بما أنك دخلت نفسك في مشكلة علشان الصالح العام، يبقى محتاج تكسب الرأي العام لأنه هو اللي هيساعدك تحقق هدفك.
• صعب المهمة على الداخلية: أنت عندك حق أنك تحمي خصوصيتك، دا غير أن الفقرة الثالثة من المادة 55 من الدستور بتقول أنه "و للمتهم حق الصمت. و كل قول يثبت أنه صدر من محتجز تحت وطأة شيء مما تقدم، أو التهديد بشيء منه، يهدر و لا يعول عليه."

تحمي خصوصيتك إزاي؟ أول حاجة هي أنك تشفر تليفوتك علشان ما حدش يعرف يفتحه. لو هتشيل تليفون ذكي و متصل بالإنترنت ننصحك أنه ما يكونش بأي نظام تشغيل غير أندرويد أو آيفون. تليفونات آيفون الجديدة متشفرة لوحدها. بعض تليفونات أندرويد الجديدة و الغالية التشفير فيها شغال لوحده، و كل تليفونات أندرويد متاح فيها التشفير من أول الإصدارة جنجبربريد Gingerbread 2.3.x، و دي بقت إصدارة قديمة حاليا لأنها بقى لها سنين. أحدث إصدارة هي 6.0.x. فيه تليفونات أندرويد، خصوصا الماركات الصيني زي هواوي التشفير مش متاح فيها، و دي يفضل تجنبها.

إزاي تشفر تليفونك؟ هنوضح هنا الإجراء لتليفونات أندرويد بما أنها أكثر التليفونات انتشارا، مع العلم أن الخطوات ممكن تختلف من جهاز للثاني تبعا للماركة و لإصدارة أندرويد.

1. شغل تأمين الشاشة screen lock: من قائمة الإعدادات settings في تليفون أندرويد، اختر الأمان security > تأمين الشاشة screen lock. علشان التليفون يقبل يشفر نفسه، محتاج نوع قوي من تأمين الشاشة. لازم تختار يا إما رمز التعريف PIN أو كلمة المرور password. خد بالك أن النقش pattern، اللي هو الرسمة اللي بترسمها على الشاشة علشان تفتح التليفون مش آمنة كفاية و مش هينفع تشفر تليفونك لو هتستخدمها.

تأمين الشاشة بيحميك من أن أي حد وقفك أو سرق التليفون أنه يفتحه و يستعمله بالطريقة العادية، لكنه مش بيحميه من خبراء الأدلة. خبير الأدلة مش بيفتح التليفون زي بقية الناس، لكنه بيوصله بسلك بجهاز كمبيوتر و ينزل كل ذاكرة التليفون على الكمبيوتر و يبدأ يفحصها على الكمبيوتر من غير ما يستعمل التليفون. الطريقة الوحيدة علشان تزود حمايتك بدرجة من خبراء الأدلة هي أنك تشفر التليفون. بالطريقة دي خبير البيانات هيقدر ينزل محتوى التليفون لكنه مش هيقدر يقراه لأنه مشفر، و فك التشفير عملية حسابية مكلفة جدا و بتاخد وقت كبير جدا حتى باستخدام أقوى الأجهزة. لو متابع الأخبار مؤخرا كنت هتسمع عن محاولات المباحث الفدرالية الأمريكية إجبار شركة آبل أنها تفك تشفير تليفون صاحبه ارتكب حادثة قتل جماعي في سان برناردينو في كاليفورنيا. شركة آبل رفضت و المباحث اضطرت تدور على طرق ثانية علشان تفك التشفير. أنت غالبا مش بدرجة الأهمية دي، فخصمك، حتى لو كانت عنده المعرفة التقنية و الموارد الكبيرة، مش هيتعب نفسه للدرجة دي. بالتالي، تشفير التليفون حماية كافية جدا.

2. شغل تشفير الهاتف encrypt phone: من قائمة الإعدادات settings في تليفون أندرويد، اختر الأمان security > تشفير الهاتف phone encryption. هتلاقي تعليمات بتأكد عليك أنك تشغل قفل الشاشة زي ما شرحنا في الخطوة السابقة، و بعدين تطلب منك أنك تشحن التليفون فوق ال80% و بعدين تدوس الزر الظاهر. عملية التشفير بتاخد وقت، فأحسن حاجة تشحن التليفون، و تسيبه في الشاحن بالليل و تدوس الزر قبل ما تنام، و تصحى ثاني يوم تدخل رقم التعريف أو كلمة المرور و تستعمل تليفونك لأول مرة بعد التشفير.

طبعا التشفير كله قايم على أن كلمة المرور معك أنت بس، و أنك مش هتقولها لحد تحت أي ظرف. و بالتالي التشفير مش هيحميك لو تعرضت لظروف تجبرك على أنك تسلم كلمة المرور زي التهديد بالعنف أو بأي نوع ثاني من الضرر لك أو لشخص يهمك. تشفير التليفون مهم جدا في حالة أن تليفونك اتسرق أو ضاع مثلا، مش بس في حالة التفتيش، و علشان كدا مهم أنك تشفر تليفونك في جميع الأحوال، و بغض النظر عن الاستراتيجية ال هتختارها علشان تتعامل مع الكمين.

الاستراتيجية الثالثة: قلل المعلومات ال على تليفونك و تعاون مع الشرطة

أغلبنا مش مستعد يجرب حظه بالاستراتيجية الأولى أو أنه يدخل في صدام مع الشرطة بالاستراتيجية الثانية. أنت هنا مش هتعترض على التفتيش بالرغم من أنه غير قانوني علشان ما تخليش حد يستقصدك، لكنك هتقلل الضرر بأنك تقلل المعلومات ال على التليفون. دي خطوات تصاعدية من الأقل فائدة للأكثر فائدة:

1. امسح بياناتك أول بأول. مرة كل أسبوع مثلا، انقل كل الملفات ال نزلتها و الصور ال صورتها و كل حاجة من التليفون للكمبيوتر و بعدين الغيها من على التليفون. أو الأحسن أنك تعيد ضبط التليفون مرة كل شهر مثلا. إعادة الضبط بتلغي كل البيانات ال على التليفون، بما فيها الأرقام و الرسائل و التطبيقات و كل حاجة، و تنزلها من أول و جديد. دا هيسرع التليفون، و هيخليك ما تفقدش بيانات و صور بتحبها لما تليفونك يضيع لأنك بتنسخها على الكمبيوتر أول بأول، و كمان هيقلل من احتمال أنك تدخل في مشكلة بسبب الصور أو الرسائل ال على تليفونك.

علشان تعيد ضبط التليفون factory reset، من قائمة الإعدادات settings، اختر نسخ احتياطي و إعادة التعيين backup and reset > إعادة الضبط بحسب بيانات المصنع factory data reset. ما تنساش أنك بعد كل مرة تعيد الضبط، هتحتاج تشفر التليفون من أول و جديد.

العملية دي ممكن تبقى أسهل كثير لو بتخزن أرقام معارفك مش على ذاكرة التليفون لكن على حسابك على جوجل، و بالتالي كل مرة تعيد فيها ضبط التليفون، هتربط تليفونك بحساب جوجل و أرقام معارفك هتنزل لوحدها.

2. احذف تطبيق فيسبوك: أول حاجة بتسألها الشرطة لما توقفك هي "طلع تليفونك و افتح الفيس". هييجي وقت نتكلم فيه عن ليه الدولة كلها، مش بس الشرطة، شايفة الإنترنت و الشبكات الاجتماعية خطر عليها و على الأمن، لكن دلوقت نحب نطلب منك أنك لو هتفتح فيسبوك من التليفون، يبقى اعمل دا من المتصفح و احذف تطبيق الفيسبوك من على التليفون خالص. أولا فيسبوك نفسها أعلنت أن التطبيق بيسجل الأصوات ال حواليه علشان مثلا يعرف أنت بتتفرج على برامج إيه في التليفزيون فيبيع لك إعلانات خلالها. دا بجد و بيحصل فعلا، مش خيال علمي. ثانيا، أن أمين الشرطة لما يقلب في تليفونك مش هيلاقي الفيس، فهيقول لك افتح لي الفيس، فهتقول له ببراءة ما عنديش فيس، و تسيبه يقلب في التليفون.

3. استعمل أقل عدد ممكن من التطبيقات: معظمنا بينزل تطبيقات أكثر من ال بيحتاجه فعلا، و التطبيقات دي طول الوقت بتجمع بيانات عنك زي تروكولر TrueCaller مثلا اللي بينسخ أرقام كل معارفك عنده أو Viber اللي عاملاه شركة إسرائيلية. هييجي وقت أكثر نتكلم فيه على تطبيقات التراسل و إيه منها ال ينفع تثق فيه و إيه ال ما ينفعش تثق فيه، لكن دا الوقت يا ريت تقلل عدد التطبيقات اللي بتستخدمها على قد ما تقدر. أحسن و أأمن حاجة ممكن تستعملها هي واتساب، و ما فيش أحسن منه غير برنامج سجنال singal للمكالمات و المراسلات المشفرة.

4. ما تشيلش تليفون ذكي أصلا، أو ما تشيلهوش كل الوقت: التليفون الذكي عبارة عن مسجل دائم لكل حركاتك و اتصالات و تفاصيل حياتك، و يمكن فيه أوقات ما تحبش يبقى معك فيها تليفون ذكي. فيه أوقات، خصوصا لو متوقع أنك تتفتش في الشارع، يبقى أفضل أنك تستعمل فيها تليفون رخيص زي نوكيا أبو كشاف مثلا. بطاريته بتفضل بالأيام، و مش بيعطل بسهولة و لا شاشته بتتكسر، و ما بيسجلش معلومات عنك قد ال بيسجلها التليفون الذكي.

فيه طريقتين علشان تستعمل تليفون رخيص بعض الوقت من غير ما تعطل حياتك: لو خط التليفون بتاعك بفاتورة كل شهر، يبقى روح شركة التليفونات و اطلب شريحة إضافية بنفس الرقم. كدا يبقى عندك رقم واحد على تليفونين ممكن تستعملهم في نفس الوقت و تختار تاخد أي واحد فيهم معك. الشريحة الإضافية بتكلف خمسة جنيه في الشهر تقريبا. الطريقة الثانية، خصوصا لو خط التليفون بتاعك بيتشحن بالكارت، هي أنك تجيب خط ثاني و تمرر، يعني تعمل call forward، المكالمات من التليفون الذكي للتليفون النوكيا أبو كشاف. دا هيكلفك أكثر شوية، لأن كل واحد هيكلمك هتدفع ثمن تمرير المكالمات للتليفون أبو كشاف. الهدف عموما هو أنك تسيب تليفونك الذكي بعيد عنك في الأوقات ال متوقع أنك تتفتش فيها.

الاستراتيجية الرابعة: خبي المعلومات ال على تليفونك و تظاهر كأنك بتتعاون مع الشرطة

الاستراتيجية دي ما تتعارضش مع الاستراتيجية الثالثة، يعني ممكن تعمل الاثنين في نفس الوقت، و نعيد التذكير أنه المفروض تشفر تليفوك بغض النظر عن الاستراتيجية ال هتختارها.

تليفونات أندرويد الجديدة، على الأقل من الإصدارة 5، بتسمح أن يبقى فيه أكثر من حساب مستخدم واحد user account على نفس الجهاز. دا يسمح لك أنك بالإضافة لحسابك، ال عليه تطبيقاتك و رسائلك و أرقام معارفك، تعمل حساب ثاني ما فيش عليه أرقام أو صور أو حسابات أو تطبيقات ممكن تعرضك للخطر. يعني هويتين على نفس التليفون. بالتالي ببعض المهارة و السرعة لما يطلب منك في الكمين أنك تفتح تليفونك، تفتحه بالفعل، و تغير بسرعة لحسابك الثاني ال ما فيش عليه معلومات كثير و تسلم تليفونك للتفتيش. طبعا فيه خطر أن ال بيفتشك يبقى عنده فكرة كويسة عن التليفونات و ياخد باله و يحاول يغير حساب المستخدم للهوية الأصلية و يجبرك أنك تتعاون معه. دي استراتيجية مؤقتة لغاية ما مهارات أغلب الشرطة توصل للمستوى دا.

علشان تفتح حساب مستخدم ثاني على تليفون أندرويد، من قائمة الإعدادات settings، اختر المستخدمون users، و بعدين أضف مستخدم جديد. علشان تغير بين الحسابين، افتح القائمة من الحافة العلوية و بعدين انقر على أيقونة المستخدم (الشخص الصغير اللي شبه عسكري الشطرنج) و بعدين اختر حساب المستخدم الأساسي اللي بتستعمله كل يوم، أو الحساب المخصوص اللي هتفتحه للشرطة في الكمين.