3.1 KiB
نرمين نزار سرحان
نرمين نزار عن وائل خليل
وائل اتفقت انا وعمرو غربية اني اكتب عنك بس بصراحة مش عارفة اكتب اقول ايه. كان المفروض اكتب انك من المؤسسين للمجموعة المصرية لمناهضة العولمة وانك ابو احمد الي عنده حوالي سبع سنين وانك جوز لمياء وانك مهندس بس الحقيقة اني لما جيت اكتب عنك او لما بفتكرك عموما كل الي بيجي في بالي حاجات تانية. بيجي في بالي كلمتك ليا لما بتكسف اروح اي حتة عامة بأبني "زقي الباب برجلك وادخلي" انت مش عارف قد ايه الكلمة دي فرقت في اني اتحول من كوني حد مشلول بوجود طفل في مسؤوليته لوحده طول الوقت لحد فاعل في الدنيا على قد ما يقدر. بفتكر وانت بتتكلم مع حد بشكل هادي قوي بس صارم وبعدين تتدور وتعبير الصرامة الجامد الي على وشك يتحول بسرعة شبه افلام الكارتون لضحكة كأنك بتسأل كانوا كويسيين الكلمتين دول؟ بفتكر نظرات تشجيعك ليا لما اقول رأي وتقول انك موافقني عليه وانت مش فاهم قبل كده كنت قد ايه بتكسف اقول رأيي في امور عامة. بفتكر قدرتك المذهلة على التعامل مع كل اشكال البشر. بفتكر اخلاصك لأجيج الي بيحسسني اني عليا مسؤولية انه كل حاجة حتعملها اجيج لغاية ما انت تطلع من السجن تكون ناجحة وعلى المستوى الي كان ممكن تكون عليه لو انت معانا. لما تطلع وتقرا الكلام ده حتستغرب اكيد. انا عارفة اني مرات بسلم ببرود وانك يمكن مش وصلاك مشاعري دي كلها علشان كده، بس الي انت مش عارفه انه ده بس لأني شخص شديد الخجل مع الناس الي يهموني بجد. انت مش متخيل انت قد ايه كنت حد من الناس الي انا بسمع لهم بشغف وبتعلم منهم وقد ايه كان بيفرق معايا في كل حاجة عامة بعملها انت رأيك وموقفك ايه مش بس لأني بعتبرك استاذ بس كمان لأن رأيك عمره ما بيبقى خالي من فكرة العامل الأنساني. الناس الي حيمسها الكلام ده محتاجة ايه وبتعمل ده من غير كلام كتير وجعجعة ودعاية. انت بتصدق في البني ادمين قوي وفي امكانية انهم يتغيروا ويغيروا علشان كده انا متأكده انك متصدق قوي كمان. كلنا مستنينك