19 KiB
على اسم مصر
النخل في العالي والنيل ماشي طوالي معكوسة فيه الصور.. مقلوبة وأنا مالي يا ولاد أنا ف حالي زي النقش في العواميد زي الهلال اللي فوق مدنة بنوها عبيد وزي باقي العبيد بجري على عيالي باجري وخطوي وئيد من تقل أحمالي محنيه قامتي .. وهامتي كأن فيها حديد وعينيا رمل العريش فيها وملح رشيد لكني بافتحها زي اللي اتولدت جديد على اسم مصر
مصر.. التلات أحرف الساكنة اللي شاحنة ضجيج زوم الهوا وطقش موج البحرلما يهيج وعجيج حوافر خيول بتجر زغروطة حزمة نغم صعب داخلة مسامعي مقروطة في مسامي مضغوطه مع دمي لها تعاريج ترع وقنوات سقت من جسمي كل نسيج وجميع خيوط النسيج على نبرة مربوطة أسمعها مهموسة والا أسمعها مشخوطة شبكة رادار قلبي جوه ضلوعي مضبوطة على اسم مصر
وترن من تاني نفس النبرة في وداني ومؤشر الفرحه يتحرك في وجداني وأغاني واحشاني باتذكرها مالهاش عد فيه شيء حصل أو بيحصل أو ح يحصل جد أو ربما الأمر حالة وجد واخداني أنا اللي ياما الهوى جابني ووداني وكلام على لساني جاني لابد أقوله لحد القمح ليه اسمه قمح اليوم وأمس وغد ومصر يحرم عليها.. والجدال يشتد على اسم مصر
ولما زماني رماني عليل نسيت كل شيء عن حبيبي الجميل لكن هوّ أبدا أنا مانساهوش
نسيت مشيته وصوته كان شكله إيه ورسمة شفايفه ولمسة إيديه نسيت نظراته نسيت لون عينيه وقوس الحواجب وسهم الرموش لكن هوّ أبدا أنا ما انساهوش
نسيت اسمه وحكايته وعرفته فين وعشنا سوى العمر والا يومين وكان م البشر والا طير بجناحين نسيت حتى كان له وجود أو مالولش لكن هوّ أبدا أنا ما انساهوش.
قطعوا الأغاني وطارت نشرة الأخبار دارت على كل دار في الكوكب الدوار يا حاضرين إعلموا الغابين بأنه في مصر اتغير الاسم منذ الآن فأصبح.. مصر ضحك التاريخ ضحكته المشهور بها واندار ودخل مناقشة مع الجغرافيا عما صار هل نعترف بالبيان اللي أُذيع العصر أم ننتظر مصر تطرد إسرائيل بالقسر وساعتها تحصل بكل جدارة يوم النصر على اسم مصر؟
على اسم مصر التاريخ يقدر يقول ما شاء أنا مصر عندي أحب وأجمل الأشياء باحبها وهيّ مالكه الأرض شرق وغرب وباحبها وهيّ مرمية جريحة حرب باحبها بعنف وبرقة وعلى استحياء وأكرهها وألعن أبوها بعشق زي الداء وأسيبها وأطفش في درب وتبقى هيّ ف درب وتلتفت تلاقيني جنبها في الكرب والنبض ينفض عروقي بألف نغمة وضرب على اسم مصر
مصر النسيم في الليالي وبياعين الفل ومراية بهتانة ع القهوة .. أزورها .. واطل ألقى النديم طلّ من مطرح م أنا طليت وألقاها برواز معلق عندنا فى البيت فيه القمر مصطفى كامل حبيب الكل المصري باشا بشواربه اللي ما عرفوا الذل ومصر فوق في الفراندة واسمها جولييت ولما جيت بعد روميو بربع قرن بكيت ومسحت دمعي في كمي ومن ساعتها وعيت على اسم مصر
مصر السما الفزدقي وعصافير معدِّية والقلة مملية على الشباك.. مندِّية والجد قاعد مربع يقرا في الجرنال الكاتب المصري ذاته مندمج في مقال ومصر قدامه اكتر كلمة مقرية قريتها من قبل ما اكتب اسمي بإيديا ورسمتها في الخيال على ابدع الأشكال ونزلت أيام صبايا طفت كل مجال زي المنادي وفؤادي يرتجف بجلال على اسم مصر
رحيلا رحيلا بغيرهوادة رحيلا فإن الرحيل سعادة عبادة إرادة سيادة ولادة رحيلا.. إلى أين ليس يهم وليس يهم بأى وسيلة… أجيراً بلقمته في البواخر… على واحدٍ من جياد القبيلة.. على مقعدٍ في ذرى الجو فاخر وتملأ لي الكأس بنت جميلة..
على قدمي .. أو بفكري .. أهاجر أبادر أغادر أخاطر أسافر ولكن إلى أين.. ليس يهم
إلى حيث لا تعبر الأفق شمس إلى القطب.. أو حلقة الاستواء… إلى حيث يسمع للجن همس إلى باطن الأرض أو في الفضاء إلى مرفأ الغد.. أو أرض أمس أرى كل شيء ومن أين جاء وأفعل ما قاله القدماء من الفقراء أو الحكماء أو الأمراء أوالأشقياء أوالبلهاء فليس يهم لقد قيل وهو الكلام المهم اللي يعيش ياما يشوف واللي يمشي يشوف اكتر.
شفت الجبرتي بحرافيش الحسين وبولاق بإبن البلد ماشي زي النمس في الأسواق بالفلاحين ع المداخل من بعيد وقريب بالأرنؤوط بالشراكسة بكل صنف عجيب مترصصين سور رهيب مزراق في ريح مزارق كأنهم لا بشر ولا خلقة الخلاق ومصرفلاحة تزرق بين رقيب ورقيب من غير أبو الهول ما ينهض ناهضة شايله حليب والصبح بدري الجبرتي ينام وقلمه يسيب على اسم مصر
مصر اللي عُمر الجبرتي لم عرف لها عُمر وطلع لقاها مكان مليان عوامّ وذعر جعيدية غوغاء يجيبوا تملي وجع الراس وخليط افارقة هنادوة روم ملل اجناس والترك في القلعة والمماليك خدودهم حمر كان عمرها ستلاف سنه.. كلها سنين خضر بس الزمان يختلف زي اختلاف الناس ناس تبني مجد وحضارة وناس بلا إحساس وناس تنام لما يزحف موكب الأحداث على اسم مصر
أنا اللي اسمي حتحور.. أنا بنت رع مثال الأمومة ورمز الحنان تفيض حلماتي وتملا الترع وتسقي البشر كلهم والغطان
أنا ربة الحب حتحور أنا أنا السيدة المنجدة المغرمين وكم من محب ف هواه انضنى دعاني وطيبت خاطره الحزين
أنا طيبة إنما طبعي صعب وديعة.. ولو ثُرت بطشي مهول ما اشوفش اللي قدامي لو ألف شعب أدوسهم وتجري دماهم سيول
ويوم رع ما فات بسناه في السما وكل العيون خايفة تنظر إليه وجاله القمر خلقته معتمة وعدى قصاده…. وضلم عليه
يا ويل اللي فتح ف أبويا العظيم يا ويل من تطاول يا ويل من ضحك يا ويلك يا مصر مصيرك أليم أنا إللي اسمى حتحور أنا ح امسحك
يحاول يهدّيني رع ما اسمعوش وادمر واطيح في البلاد والعباد أنا الطيبه.. كنت زي الوحوش سفكت دماء البنات والولاد
دبحت المحبين فى عزالقبل هدمت المعابد على المنشدين قلبت على النحاتين الجبل حرقت الغيطان هم والفلاحين
لحد ما رع نادى ع الآلهة وقال صبوا في النهر كل النبيذ وشفت المياة حمرا ومزهزهة وظنتيه دم الضحايا اللذيذ
شربت انتقاما شربت شربت وأنا بالعن المفتري والغبي وحبة بحبة عن الوعي غبت ونمت على النيل فى ضي أبي
وقمت.. بكيت من فؤاد أم ثكلى ونههت فوق صدر مصر العريض على العالم المبدورين جنبي قتلى وكان دمعي ينصب فى النيل يفيض
وأقول ليه يا مصر ولادك كده يا إما المذلة يا يتجبروا يا خوفي يا فرحة قلوب العدا ويا ندمي لو ما يتغيروا
ومن يومها والنيل في نفس المعاد يفيض كل عام قبل فصل الخريف بلون حُمرة الدم يملا البلاد ويملا النسايم بعطر مخيف
بعطري أنا اللي اسمى حتحور أنا وعطري مخيف وحنون وطري يفوح بس مرة في كل سنة ويهمس يا مصر اذكري .. واحذري
نهايته مصر اللي كانت أصبحت وخلاص تمثال بديع انقلب وأنفه في الطين غاص وناس من البدو شدوا عليه حبال الخيش والقرص رع العظيم بقى صاج خبيز للعيش وساق محارب قديم مبتورة ف أبوقرقاص ما تعرف اللي بترها سيف والا رصاص والا الخراب اللي صاب عقل البلد بالطيش قال ابن خلدون أمم متفسخة تعيش ليش وحصان عرابي صهل صحى جميع الجيش على اسم مصر
حصان عرابي جميل حصان عرابي أصيل حصان عرابي رشيق القد ديله طويل يسهر مع الخيل طول الليل يتكلم ويقول آراء رغم إنه ما كانش متعلم ويقف في عابدين وياخد زاوية البروفيل للرسامين يرسموه ونشوفه جيل ورا جيل ويعدى كالريح على المجاريح ويسلّم وحافره ع الصخر فى التل الكبيرعّلم ولما صابه انفجار القنبلة إتألم على اسم مصر
وألمس حجارة الطوابي وأدق بكعابي يرجع لى صوت الصدى يفكرني بعذابي يا ميت ندامة على أمة بلا جماهير ثورتها يعملها جيشها ومالها غيره نصير والشعب يرقص كأنه عجوز متصابي إنهض من القبر واحكي القصة يا عرابي يطل لي رافع الطهطاوي م التصاوير شاحب ومجروح في قلبه وجرح قلبه خطير وعيونه مغرورقين بيصبوا دمع غزير على اسم مصر
مالك سلامتك بتبكى ليه يا طهطاوي قال لك. عرابي.. انكسر بسلاح أوروباوي وسلاح أوروبا ماهواش المدافع بس ده فكرناقد مميز للثمين والغث قلناها ميت ألف مرة بصوت جهير داوي بس الحماقة لا ليها طبيب ولا مداوي ولا حد م الخلق بالخطر اللي داخل حس الغفلانين اللي خلوا العقل صابه مس قا لوا الخطر هوّ فكر اوروبا لو يندّس على اسم مصر
أحسنت في القول صحيح يا ولد يا متنبي جبت اللي جوه الفؤاد عن مصر متعبي وحكمت بالعدل لكن بعضنا انظلموا "يا أمة ضحكت من جهلها الأمم". العلم كان عندنا من صغره متربي لكنه هاجر وعدى البحر متخبي لما الإيران هجموا ثم اليونان هجموا ثم الرومان دمروا ثم التتار هدموا ثم الجميع كل واحد جه مسح قدمه على اسم مصر
أيها الديك رفيع الموضع يا صفيحاً فوق مسمار يدور صف لنا فعل الرياح الأربع قل لنا.. لو كنت تدري ما يدور
قال صه. فالآن ريح الشرق جاءت تحمل الضوضاء من سوق المزاد وتغني دون لحن كيف شاءت أنا ريح الشرق أُدعى شهرزاد
أنا أحكي ثم أحكي ثم أحكي وأمامي السيف كالعشب يميل وبكائي يتساوى مع ضحكي طالما كان بأسلوب جميل
ثم ها قد أرسل الغرب رياحه تزكم الأنف برائحة عجب وتغني كبغي في مناحة أنا ريح الغرب لوني كالذهب
أنا صفراء برمل الصحراء أدفن الخضرة تحتي دون رحمة أوصَدوا الباب بوجهي الحُقراء حسناً فلتصبح القرية فحمة
ثم ها قد اقبلت ريح الجنوب بدخان الدهن تسري عابقة وتغني إنني أُدعى الهبوب أنا سوداء كبئر المشنقة
أنا سوداء كأفعى هائلة كرماد النوم ينثر في العيون كالعرايا في المروج الموحلة سعداء.. تعساء.. يرقصون
وتأنى برهةً ديك الصفيح يلقط الأنفاس وهو يترنح دائراً دورته مع كل ريح وأخيرا صاح كالأسد المجنح
هللويا.. أقبلت ريح الشمال في غلالاتٍ رقاقٍ راعشة وهي تشدو بحنو ودلال ها أنا ريح الشمال المنعشة
إنني وردية مثل العسل ديدمونا .. هكذا يدعونني قد عبرت البحر يحدوني الأمل لعطيلٍ أسمرٍ.. يخنقني!
ومضى ديك الرياح في دعه من يمين ليسار يتذبذب وبدا اضحوكةً وإمّعه وهو مصلوبٌ شهيدٌ يتعذب
وعلى رأي المثل .. الديك الصفيح بيدوخ ويا الريح والديك الفصيح من البيضة بيصيح .. ويقول بالصريح
الفكر فوق في الشمال يالله إلحقوه يا ولاد لحقوه ولاد من ولاد الأغنيا الأسياد وهم راجعين رموه م الباخرة في البحر ونزلوا حكموا في ظل الإنجليز والقصر ومصر في الشمس بتغربل كلام منعاد عن إبن بنت إبن حنت وطارق إبن زياد والإنجليز راضية بالخطباء وخطب الفخر خطيب يهزالرؤوس وخطيب يهزالخصر وخطيب يموت موتة الأبطال قتيل القهر على اسم مصر
والإنجليز معجبين بمراسم التأبين مات مصطفى كامل اتملت البلد صواوين والمشرقين شوقي جابهم لجل يبكوا عليه آه لوعرف همّ إيه دلوقت وبقم إيه المشرق الأولاني هو شعب الصين هزم التخلف بتنظيم إشتراكي رصين تنظيم يروح اللومان على طول كده برجليه والمشرق التاني ينحط الحديد فى إيديه مليون شهيد يعني ثورة تخض شوقي بيه على اسم مصر
هل مصر موميا جميلة صورتها فوق النعش يعشقها مجنون ينادي عليها ولا تطلعش هل مصر نار صفصفت والنفخ فيها محال والارض نشعت على رمادها استحال أوحال سألت أنا الرافعي كان عجز ولا بيسمعش لكن عينيه كانوا يحكولي قصص ما اشبعش يقولولي ماتخافش مصر بخير وعال العال مصر الجبرتى ومصر الرافعي حال غير حال انظر محمد فريد اعظم وأرقى مثال على اسم مصر
خد الكتاب في يمينك وانظر الترقيم عند المحبة وعند الموت في حرف الميم تلقى محمد فريد بينهم مقيم ع العهد وتلقى وجهه المدور زي قرص الشهد مليان حماسة وكياسة وجدعنه وتصميم على إيه مصمم؟.. يسهّم زي كل زعيم ويقول على الثورة مهما اتطلبت من جهد أنا مش عرابي اللي وأدوا ثورته في المهد أنا بابني في السر شيء صعب المنال كالفهد على اسم مصر
محلول مركز من السكر في كباية وف قلبه خيط يتلضم حبايه حبايه سكرنبات بللورات ألماظ بتضوي ضيّ وتفضل الألماظات تكبر شويّ شويّ لحد ما العُقد يبقى في الجمال غايه ده الحزب في الشعب نضربه المثل آيه الصلب والسايل الاتنين سوا يا خيّ تنظيم محمد فريد في كل قريه وحيّ بللوره بتشع بالثورة اللي يومها جيّ على اسم مصر
العُقد ألماظ ورقبة مصرلايقاله ضيع فريد كل أرضه عليه وأمواله وفجأة حاكموه ويالله نفوه عن الأوطان وحرب عالمية أولى ووفد م الأعيان وثورة والإنجليز انحطوا وانشالوا مين اللي نظَّم فلول الشعب ده بحاله إزاي جميع البلاد تنهض في نفس الآن القاهرة اسكندرية منفلوط اسوان وبعيد يا ولداه فريد مرمي وحيد شرقان على اسم مصر
السيمفونية اسمها الثورة على المحتل سنة تسعتاشر اتعزفت في كل محل تأليف محمد فريد ألفها من سنوات وكتب لها النوتة بوق وبيانو وكمنجات عزفوها من غير قيادته وجمعهم ما اختل غيروقت صرف الأجور لما النفر ينذل من وقتها وغلوشت نغمات على نغمات وسعد زغلول زعيم مشغول في الانتخابات يخطب ويضرب بإيده يطبع البصمات على اسم مصر
وف أوضة عريانة فيها كل شيء بردان رقد فريد وحده بالحمى وبالهذيان وقام وقف ع السرير في تلج ألمانيا ينده يا مصر اسمعى اللي مفارق الدنيا وصيتي الثورة لاشتراكية والبنيان ثورة بحق وحقيق مش حركة م الأعيان ماتغمضوش عن وحوش الغرب ولا ثانية ح تروح وحوش لنجليز تطلع وحوش تانية وسقط ونطق الشهادة ونظرته الحانية على اسم مصر